Türkmenistanyň ulag-logistika ulgamyny ösdürmekde döwrebap awtomobil ýollarynyň gurluşygy möhüm ugurlaryň biri bolup durýar. Ýurdumyzda halkara talaplaryna laýyk gelýän ýokary tizlikli awtomobil ýollarynyň döredilmegi ulag geçelgeleriniň mümkinçiliklerini giňeltmäge, ýol hereketiniň howpsuzlygyny ýokarlandyrmaga we ykdysady gatnaşyklaryň işjeňleşmegine uly şert döredýär.

Şu ýylyň möhüm ulag taslamalarynyň biri bolan Aşgabat — Türkmenabat ýokary tizlikli awtobanynyň ulanmaga berilmegi bu ugurda amala aşyrylýan giň gerimli işleriň aýdyň beýany boldy. Umumy uzynlygy takmynan 600 kilometre barabar bolan bu awtomobil ýolunyň gurluşygy üç tapgyrda ýerine ýetirildi.

Täze awtobanyň gurluşygynda halkara tejribesine aýratyn üns berildi. Ýol işleri ýokary hil ölçeglerine laýyklykda, şol sanda Germaniýanyň ýokary tizlikli ýollarynda ulanylýan «DIN» standartlary we degişli gurluşyk kadalary esasynda alnyp baryldy. Munuň netijesinde ulag serişdeleriniň howpsuz we amatly hereket etmegi üçin zerur şertler döredildi.

Häzirki wagtda Aşgabat — Türkmenbaşy ýokary tizlikli awtobanynyň gurluşygyna taýýarlyk görülýär. Bu taslama üstünlikli amala aşyrylanda, ýurdumyzyň gündogar serhedinden başlap, Hazar deňziniň kenaryndaky Türkmenbaşy halkara deňiz portuna çenli uzalýan döwrebap ulag geçelgesi emele geler.

Uzynlygy 560–600 kilometre golaý boljak bu awtomobil ýoly Aşgabat şäherinden başlap, Ahal we Balkan welaýatlarynyň çäginden geçer. Ol Aşgabat — Türkmenabat awtobanynyň logiki dowamy bolup, Türkmenistanyň çäginden geçýän «Gündogar — Günbatar» ulag ugruny has-da berkitmäge mümkinçilik berer.

Täze ulag geçelgesi Hytaýdan we Merkezi Aziýa döwletlerinden gelýän ýükleriň Türkmenabat hem-de Aşgabat şäherleriniň üsti bilen Türkmenbaşy portuna has çalt we bökdençsiz ýetirilmegine şert döreder. Şeýle hem Hazar deňzi arkaly Azerbaýjana, Gruziýa, Türkiýe Respublikasyna we Ýewropa ugur alýan ýük akymlarynyň artmagyna oňyn täsir eder.

Ýokary tizlikli awtomobil ýollarynyň ösdürilmegi diňe bir ýük daşamak ulgamyna däl, eýsem syýahatçylyk pudagyna hem täze mümkinçilikleri açýar. Amatly ýol şertleriniň döredilmegi ýurdumyzyň gözel künjeklerine hususy ulaglar we döwrebap şäherara awtobuslar arkaly syýahat edýänleriň sanynyň artmagyna ýardam eder.

Syýahatçylaryň sanynyň köpelmegi bilen myhmanhana, jemgyýetçilik iýmiti, söwda we dynç alyş hyzmatlary ýaly ugurlaryň ösüşi üçin täze mümkinçilikler döreýär. Şeýlelikde, ýylboýy hyzmat edýän döwrebap infrastruktura kemala gelip, ulag ulgamy milli ykdysadyýetiň möhüm ösüş ugurlarynyň birine öwrüler.

Türkmenistanyň ýokary tizlikli awtomobil ýollary diňe bir içerki ulag mümkinçiliklerini giňeltmän, eýsem ýurduň halkara ulag geçelgelerindäki ornuny hem has-da pugtalandyrýan strategik taslamalar bolup durýar.