«Azerbaýjanyň Kaspi deňiz gämi ýük gatnawy» ýapyk görnüşli paýdarlar jemgyýeti Baku — Türkmenbaşy — Baku ugry boýunça awtomobilli ýükleriň gämiler arkaly daşalyşynda arzanlaşyk yglan edýär. «Azertag» habarlar agentliginiň mälim etmegine görä, ýük daşalyşyndaky täze tarifler 1-nji martdan güýje girýär.

Paýdarlar jemgyýetine degişli gämiler arkaly adaty ýük awtomobili (uzynlygy 16,5 metr) Baku — Türkmenbaşy we Türkmenbaşy — Baku birtaraplaýyn ugra 1 müň amerikan dollary nyrhynda daşalar. Mundan ozal, bu ugur boýunça ýük awtomobili bir tarapa 1072 dollar bahada gämiler arkaly daşalýardy.

Iki ugur boýunça petekler alnan ýagdaýynda ýük awtomobili 1600 dollardan daşalar. Mundan ozal, ikitaraplaýyn ugra ýük awtomobilleri 1716 dollardan daşalýardy. Eger ýük awtoulaglary 16,5 metrden uzyn ýa kiçi bolsa, gämili ýük daşalyşdaky tarifler standart ýük awtoulagynyň möçberine laýyklykda bölünip hasaplanýar.

Ýeri gelende bellesek, Baku — Türkmenbaşy — Baku ugry boýunça fewral aýynyň başyndan bäri ýeňil awtoulaglar ýeňillikli tarifler esasynda daşalýar. Ozallar degişli ugur boýunça ýeňil awtoulaglar 325 dollardan daşalan bolsa, indi ol 200 amerikan dollaryna deňdir.

Gämili ýük daşalyşda ýeňillikli tarifler Türkmenistandan Hazar deňzi boýunça awtomobil ýük daşalyşynda amatly mümkinçilikleri döretmek maksady bilen girizildi.