Şu gün — 17-nji ýanwarda Astrahan şäherinde Türkmenistanyň, Russiýanyň, Özbegistanyň we Gyrgyz Respublikasynyň wekilleriniň gatnaşmagynda Hazar deňzinde yzygiderli ýük gämi gatnawlaryny ýola goýmak meseleleri ara alnyp maslahatlaşyldy. Bu barada «TASS» habarlar agentligi mälim edýär.

Maslahatda çykyş eden Russiýanyň Astrahan oblastynyň Hökümetiniň başlygy Denis Afanasýewiň sözlerine görä, Gyrgyz Respublikasyndan başlanýan we Russiýa uzaýan täze halkara multimodal ulag ugrunyň döredilmegi ýurtlaryň ykdysady ösüşine itergi berer. Bu halkara ulag ugrunyň esasy bölegi Türkmenistanyň üstünden geçip, Türkmenbaşy Halkara deňiz porty arkaly Russiýa yzygiderli ýük gämi gatnawlarynyň ýola goýulmagyny öňe sürýär.

Maslahata gatnaşýan Gyrgyz Respublikasynyň Ulag we kommunikasiýa ministrliginiň Awtomobil we demir ýol edarasynyň ýolbaşçysy Adylbek Akmatowyň mälim etmegine görä, Gyrgyzystanyň awtomobil ýük daşaýjylary bellenen ugur boýunça ýükleriň daşalmagyna uly gyzyklanma bildirýärler. Onuň mälim etmegine görä, gyrgyz tarapy bu halkara multimodal ulag ugry arkaly her günde 50 sany awtoulag ýüküniň gämiler arkaly daşalmagyny üpjün edip biler.

«Türkmendeňizderýaýollary» agentliginiň direktorynyň orunbasary Seýitguly Baýseýidowyň bellemegine görä, Türkmenistan Türkmenbaşy Halkara deňiz porty arkaly Astrahan ugruna ýükleriň daşalmagynyň artdyrylmagy üçin ýeňillikli tarifleri hödürlemäge taýýardyr.

Mälim edilmegine görä, 2022-nji ýylda Astrahan oblastynyň iki deňiz porty arkaly ýük geçirilişi 15 göterim ösüp, 3 million tonna deň boldy.